នារសៀលថ្ងៃអង្គារ ៤រោច ខែមិគសិរ ឆ្នាំម្សាញ់ សប្តស័ក ពុទ្ធសករាជ២៥៦៩ ត្រូវនឹងថ្ងៃទី៩ ខែធ្នូ ឆ្នាំ២០២៥ ក្រុមសមាជិកព្រឹទ្ធសភាប្រចាំភូមិភាគទី២ (ខេត្តកំពង់ចាម និងខេត្តត្បូងឃ្មុំ) ដឹកនាំដោយឯកឧត្តម អ៊ុច បូររិទ្ធ អនុប្រធានទី១ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ បានអញ្ជើញគោរពវិញ្ញាណក្ខន្ធសពលោកជំទាវ លី ណៃស្រ៊ន់ ឧត្តមភរិយារបស់ឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ដែលទទួលមរណភាពកាលនៅថ្ងៃអង្គារ ទី៩ ខែធ្នូ ឆ្នាំ២០២៥ វេលាម៉ោង ៣:០០ នាទី ក្នុងជន្មាយុ៨៣ឆ្នាំ ដោយជរាពាធ។
ក្នុងឱកាសប្រកបដោយសមានទុក្ខដ៏ក្រៀមក្រំនេះ ឯកឧត្តមប្រធានក្រុមភូមិភាគទី២ បានចូលរួមរំលែកទុក្ខ និងការស្តាយស្រណោះ អាឡោះអាល័យស្ទើរកទីបំផុតគ្មាន ព្រោះថាមរណភាពលោកជំទាវ លី ណៃស្រ៊ន់ គឺជាការបាត់បង់នូវឧត្តមករិយា ម្តាយ ម្តាយក្មេក និងជីដូន ចំពោះក្រុមគ្រួសារជាទីស្រលាញ់ដ៏ជ្រាលជ្រៅ និងប្រកបដោយព្រហ្មវិហារធម៌របស់កូនៗ ចៅ ចៅទូត ព្រមទាំងក្រុមគ្រួសារ ព្រមទាំងបានឧទ្ទិសបួងសួងដល់ដួងវិញ្ញាណក្ខន្ធលោកជំទាវ លី ណៃស្រ៊ន់ បានបដិសន្ធិក្នុងសុគតិភពកុំបីឃ្លៀងឃ្លាតឡើយ។
ក្នុងឱកាសនោះ ឯកឧត្តម អ៊ុច បូររិទ្ធ និងក្រុមសមាជិកព្រឹទ្ធសភាប្រចាំភូមិភាគទី២ បានចូលរួមថវិកាជាមួយគ្រួសារសពចំនួន១.៥០០.០០០៛ (មួយលានហាសិបម៉ឺនរៀល)។
សពរបស់លោកជំទាវ លី ណៃស្រ៊ន់ ត្រូវបានតម្កល់ធ្វើបុណ្យទក្ខិណានុប្បទាន តាមប្រពៃណីព្រះពុទ្ធសាសនា នៅភូមិតាណេង សង្កាត់សំបួរមាស ក្រុងកំពង់ចាម ខេត្តកំពង់ចាម។
ប្រភព៖ នាយកដ្ឋានព័ត៌មាន
